partekatu
• MARTXOAREN 8a
Lasarte-Oriak talentua eta berdintasunarekiko konpromisoa aitortu ditu Martxoaren 8ko Kartel Lehiaketaren sari banaketan
20 proposamen baino gehiago jaso dira, eta horietatik aterako da 2026ko Martxoaren 8ko irudi ofiziala.
Lasarte-Oriako Udalak Martxoaren 8ko Kartel Lehiaketaren sari banaketa ospatu du. Urtez urte, lehiaketa honek herritarren sormena eta berdintasunarekiko konpromisoa balioan jartzen ditu artearen bidez.
Ekitaldia Agustín Valdivia alkateak eta Nuria Fernández Berdintasun zinegotziak zuzendu dute, eta aurkeztutako lanen kalitatea eta parte-hartzaileen ahalegina aitortzeko baliatu da. Guztira, 21 lan aurkeztu dira: 19 Oriarte Institututik, bat Unitate Psikosozialetik eta beste bat lan librea.
Alkateak bere hitzaldian nabarmendu duenez, "artea gizartea eraldatzeko tresna indartsua da", eta lehiaketa honek berdintasunaren mezua gizarte osoari helarazten laguntzen du. “Kartelek sormena islatzeaz gain, aukera-berdintasunaren aldeko mezu positibo eta argia transmititzen dute”, azpimarratu du Valdiviak.
Bestalde, Nuria Fernández Berdintasun zinegotziak gogorarazi du “martxoaren 8a ez dela egutegiko data hutsa, baizik eta berdintasunaren aldeko borrokan egindako bidearen eta oraindik geratzen denaren oroigarri”. Era berean, azaldu du irabazle izendatutako kartela 2026ko Martxoaren 8ko kanpainaren irudi ofiziala izango dela eta Udalak antolatutako ekintza eta jarduera guztien zabalkundean agertuko dela.
Epaimahaia berdintasun arloko teknikariek eta arte zein komunikazio arloko profesionalek osatu dute, eta lanak ebaluatzeko hainbat irizpide izan dituzte kontuan: kalitate tekniko eta artistikoa, originaltasuna eta berdintasunaren inguruko mezu argia helarazteko gaitasuna.
Aurtengo edizioan sari hauek banatu dira:
- Hirugarren saria (60 €): Garoa Elizondorentzat.
- Bigarren saria (90 €): Anni Yao Zhanentzat.
- Lehen saria (120 €): Chloe Maze Zaldúa – Kartel hau izango da 2026ko Martxoaren 8ko irudia.
Aurkeztutako lan guztiak ezagutu nahi dituztenentzat, kartelen erakusketa Emakumeen Etxean egongo da ikusgai martxoaren 8ra arte.
Lasarte-Oriako Udalak parte-hartzaile guztiei zorionak eman dizkie eta artea kontzientziazio eta eraldaketa sozialerako tresna gisa erabiltzen jarraitzera animatu ditu.
Eskerrik asko parte hartu duzuen guztioi eta zorionak irabazleei!
Argazkia eta informazioa: Lasarte-Oriako Udala
